Владејачката ВЛЕН соопшти дека според анкета на агенцијата Stratum R&D, спроведена во јуни, има поддршка од 34% од албанските гласачи, додека за ДУИ би гласале 30% доколку изборите се одржат сега.
ВЛЕН соопшти дека ова е второ истражување во последните два месеца кое ја става партијата пред ДУИ и оцени дека резултатите покажуваат оти граѓаните ја поддржуваат, како што наведува, „политиката на резултати“.
ВЛЕН како аргумент за зголемената поддршка ги наведе усвојувањето на Законот за правична и соодветна застапеност, Законот за игрите на среќа, Законот за Медресата, измените во високото образование, воведувањето на повеќе од 40 стручни испити на албански јазик, проектите за општините, инфраструктурните инвестиции и зголемувањето на платите и пензиите.
ДУИ ги отфрли наводите, оценувајќи дека анкетата е нетранспарентна и политички мотивирана.
Партијата соопшти дека не се познати нарачателот, финансиерот, методологијата, примерокот и целосниот прашалник на истражувањето. Според ДУИ, агенцијата што ја спровела анкетата не објавувала позначајни истражувања во изминатите две години и, како што наведува, нејзиното повторно појавување отвора сомнежи за политичка пропаганда.
ДУИ оцени дека објавените резултати не ја одразуваат реалната поддршка меѓу гласачите и ја обвини ВЛЕН дека преку анкети се обидува да го прикрие, како што тврди, падот на својата политичка поддршка.