Коалицијата ВЛЕН ги повика Јавното обвинителство и надлежните институции да отворат истрага за проектот за канализација од Зајас до Кичево, тврдејќи дека според евиденцијата на Европската унија проектот е завршен во 2024 година, но во реалноста не е ставен во функција.
Реакцијата следува по изјавата на амбасадорот на Европската унија во Северна Македонија, Михалис Рокас, дека според податоците на Канцеларијата на ЕУ во Скопје проектот фигурира како реализиран.
Од ВЛЕН посочуваат дека ДУИ, која три мандати раководеше со Општина Кичево, треба да даде одговори за реализацијата на проектот и за трошењето на средствата обезбедени од Европската унија.
Коалицијата постави повеќе прашања, барајќи да се утврди кој бил одговорен за спроведувањето на проектот, зошто тој не бил завршен во предвидениот рок, каде завршиле средствата од ЕУ и кој имал корист од проект што, според официјалната документација, е завршен, но на терен не постои.
ВЛЕН оцени дека молкот на ДУИ само ги зголемува сомнежите и побара Обвинителството да ја провери секоја потрошена евроцент и да ја утврди евентуалната одговорност.
„Граѓаните на Кичево заслужуваат да знаат каде завршиле средствата на Европската унија и зошто проект што на хартија е завршен не постои во реалноста“, се наведува во соопштението.
Од коалицијата порачаа дека секој што злоупотребил јавни или европски средства треба да сноси одговорност.