Основниот кривичен суд Скопје донесе одбивателна пресуда во предметот „Тотал“, откако Јавното обвинителство целосно се откажа од обвинението за даночно затајување против новинарот Драган Павловиќ-Латас.
Од Кривичниот суд соопштија дека обвинителот најпрво го изменил обвинителниот акт врз основа на супервештачење од областа на економското и финансиското работење, по што утврдил дека за две обвинети правни лица не се исполнети законските елементи на кривичното дело, додека за Латас и едно правно лице во меѓувреме настапила апсолутна застареност на кривичното гонење.
Јавното обвинителство соопшти дека супервештачењето го намалило износот на наводното даночно затајување, поради што обвинението морало да биде преквалификувано од потежок во полесен облик на делото. Со таа преквалификација, според Обвинителството, настапила апсолутна застареност на 15 март 2024 година.
Предметот „Тотал“ беше отворен од поранешното Специјално јавно обвинителство и се однесуваше на наводно даночно затајување во периодот од 2008 до 2015 година преку фирмите „Тотал маркетинг“ и „Тотал медиа центар“.
По објавувањето на одлуката, опозициската СДСМ оцени дека случајот е доказ за, како што наведува партијата, политичко влијание врз Обвинителството и правосудството.
Пресудата, според информациите од Судот, е донесена во мај годинава и веќе е правосилна.