Американскиот претседател Доналд Трамп потврди дека тајно го сменил авионот при заминувањето од НАТО-самитот во Турција минатиот месец, откако американските безбедносни служби процениле дека постои можна закана по неговиот живот.
„Го следам тоа што ми го кажуваат Тајната служба и војската. Тие сакаа да одам со друг лет, со друг авион. Јас само морам да го правам тоа што ќе ми го кажат“, изјави Трамп пред новинарите.
Според американските медиуми, Трамп на 8 јули пред телевизиските камери се качил во претседателскиот авион „Ер форс уан“ на аеродромот во Анкара, но потоа незабележано го напуштил авионот преку кетеринг-возило и бил префрлен во помал воен авион C-32A, модифициран „боинг 757“.
Американски официјални лица изјавиле дека разузнавачките служби добиле информации за веродостојна иранска закана, вклучително и можност за напад со ракета врз авионот на претседателот. „Њујорк тајмс“ објави дека американското разузнавање располагало со информации за лице во близина на НАТО-самитот кое било забележано со пренослив ракетен систем.
Новинарите и дел од персоналот на Белата куќа кои останале во „Ер форс уан“ не знаеле дека претседателот повеќе не е во авионот. Според извештаите, од нив било побарано да ги спуштат ролетните на прозорците, додека авионот продолжил да го користи повикувачкиот знак „AF1“ како дел од безбедносната операција.
Трамп рече дека авионот со кој навистина патувал можеби бил изложен на уште поголем ризик.
„Тоа веројатно би бил авионот по кој повеќе би тргнале“, рече тој.
Американскиот претседател додаде дека редовно добива закани.
„Претпоставувам дека имаше закана. Не прашував многу. Добивам многу закани за кои вие не знаете“, рече Трамп.
Тајната операција се случила еден ден откако САД ги обновиле воените напади врз Иран по пропаѓањето на преговорите меѓу Вашингтон и Техеран за прекин на војната.
На патот кон САД, американската делегација застанала во британската воздухопловна база Милденхол, каде што Трамп повторно бил префрлен во претседателскиот авион. Потоа бил виден како излегува од него, оставајќи впечаток дека цело време патувал со „Ер форс уан“.
Комитетот за заштита на новинарите оцени дека администрацијата има обврска да обезбеди новинарите кои го следат претседателот да не бидат непотребно изложени на опасност и, кога е можно, да бидат информирани за сериозни безбедносни ризици.