ВЛЕН побара независна истрага и целосна одговорност за пожарот во модуларната болница во Тетово, во кој загинаа 14 лица, обвинувајќи дека досегашниот институционален епилог не обезбедил правда за жртвите и нивните семејства.
Од коалицијата велат дека отсуството на целосна кривична одговорност претставува „повторна виктимизација“ на загинатите и нивните семејства.
„Али Ахмети и Обвинителството раководено од Ислам Абази ѝ должат одговор на јавноста: како е можно по 14 загубени животи, на крајот да излезе дека ‘виновен’ е кабелот?“, се наведува во реакцијата на ВЛЕН.
Според ВЛЕН, случајот ризикува да остане пример за институционална неодговорност и неуспех на правосудниот систем.
Од коалицијата велат дека правдата не смее да зависи од политичко влијание, партиска припадност или функцијата на која се наоѓа одредено лице.
„Кога за трагедија со 14 жртви нема целосна и непристрасна одговорност, не станува збор само за неуспех на едно обвинение, туку за тешка загуба за целиот правосуден систем“, велат од ВЛЕН.
Во соопштението се упатуваат и остри политички обвинувања кон ДУИ, при што ВЛЕН тврди дека исходот од случајот претставува товар за поранешното раководство на владејачката партија.
„За ДУИ, се чини дека 14 човечки животи се само статистика. Но, за семејствата на жртвите тие се незаменливи животи, а за целото општество обврска вистината да се расветли и правдата да биде задоволена“, се наведува во реакцијата.
ВЛЕН најави дека ќе продолжи да бара независна истрага, непристрасно утврдување на одговорноста и правда за секоја од 14-те жртви.
Коалицијата воедно најави дека политичката одговорност за случајот ќе ја бара на следните парламентарни избори, без оглед кога тие ќе бидат одржани.
„Албанците тргнуваат по својата правда“, порача ВЛЕН.