Цените на нафтата пораснаа во петокот, продолжувајќи ги добивките од претходната сесија, откако иранските предлози за идниот режим на пловидба низ Ормутскиот Теснец ги зголемија сомнежите дека клучниот енергетски коридор наскоро ќе се врати на нормално функционирање.
Фјучерсите на Брент пораснаа за 85 центи, или 1,03%, на 83,34 долари за барел, додека американската нафта WTI поскапе за 52 центи, или 0,67%, на 77,81 долари.
Цените во четвртокот пораснаа за повеќе од три долари за барел откако во Иран почна разгледување на предлог со кој би можело да им се забрани минување низ Ормутскиот Теснец на американски, израелски и други бродови што Техеран ги смета за непријателски.
Според иранската новинска агенција Фарс, парламентарна комисија разгледува прелиминарен предлог-закон кој, покрај забраната, предвидува прекршителите да бидат казнети со сума до 20% од вредноста на товарот.
Ормутскиот Теснец е една од најважните точки за глобалната енергетска трговија. Пред почетокот на војната на крајот од февруари, низ него вообичаено минуваше околу една петтина од светската трговија со нафта и течен природен гас.
Иран, кој со Оман работи на можен договор за повторно отворање на теснецот, бара и воведување такси за бродовите што ќе го користат коридорот.
Според висок ирански претставник, Техеран бара надомест од 5% до 7% од вредноста на товарот, додека Оман разговара за такса од околу 3%. Вашингтон се противи на какви било такси.
Четири извори од индустријата велат дека предложениот модел тешко би можел да функционира поради американските санкции и ограничувањата во осигурителните договори за вакви плаќања.
„Пазарот не калкулира лош договор, туку потврда дека каков било исход ќе значи управуван и условен коридор, а не враќање на нормалниот проток“, рече Лин Је од консултантската компанија Rystad Energy.
Нафтата претходно неделава поевтинуваше поради очекувањата дека е можно дипломатско решение на конфликтот. Брент во четвртокот повторно ја надмина границата од 80 долари, откако претходно падна под неа првпат од 13 јули.
И покрај последниот раст, двата главни нафтени репери се движат кон неделен пад од околу 8%.
Дополнителна неизвесност донесоа и Хутите во Јемен, кои соопштија дека во четвртокот извршиле ракетни и напади со беспилотни летала врз саудиски позиции во Мариб и Хадрамаут.
Американскиот претседател Доналд Трамп, сепак, во четвртокот изјави дека верува оти војната наскоро ќе заврши.