Онколошките пациенти во среда ќе одржат симболичен протест пред Министерството за здравство поради повторниот недостиг на лекови на Универзитетската клиника за радиотерапија и онкологија.
Поради високите температури, на протестот ќе присуствуваат само неколку пациентки, кои ќе ги потсетат надлежните дека континуираниот недостиг на терапија останува сериозен проблем за лицата кои се лекуваат од малигни заболувања.
Организаторите велат дека прекините во снабдувањето со лекови не се изолиран случај, туку проблем што се повторува и создава неизвесност кај пациентите.
Во јавноста повторно беа упатени критики и за долгото чекање за дијагностички резултати, специјалистички прегледи и започнување на терапијата.
Бојана Стојчевска, преку објава на социјалните мрежи, оцени дека онколошките пациенти со месеци чекаат резултати и лекување, додавајќи дека здравствениот систем не обезбедува навремена грижа за најтешко болните.
Пациентите бараат Министерството за здравство да обезбеди континуирано снабдување со онколошките лекови и да воспостави систем што ќе спречи повторување на недостигот на терапија.
Прашањето за функционирањето на Клиниката за онкологија останува во фокусот на јавноста по серијата претходни случаи поврзани со недостиг на лекови и управувањето со терапијата, поради што институциите беа предмет на истраги и засилен јавен надзор.