Пратеничката на ВМРО-ДПМНЕ, Лидија Петкоска, преку објава на социјалните мрежи одговори на критиките на СДСМ за употребата на зборот „талог“, оценувајќи дека проблемот не е во самиот збор, туку во тоа што, според неа, опозицијата се препознала во него.
„Да не се лутат на зборот ‘талог’, да се лутат поради причината во која се препознаваат во него. Јасно ни е од каде доаѓа нервозата“, напиша Петкоска.
Таа оцени дека реакцијата на опозицијата покажува дека „сама се препознала“, додавајќи дека никој не бил именуван директно. Во објавата упати критики кон поранешната власт, обвинувајќи ја за слаби економски резултати, застој во инфраструктурните проекти и неспособност во управувањето со државата.
Реакцијата следува откако претходно членот на Извршниот одбор на СДСМ, Андреј Жерновски, го обвини премиерот Христијан Мицкоски дека во илинденскиот говор ги навредил граѓаните со употребата на терминот „талог“ и дека со таквата реторика ги продлабочува политичките поделби.
Во меѓувреме, генералниот секретар на ВМРО-ДПМНЕ, Драган Ковачки, исто така порача дека „никој не бил спомнат по име“, но дека политичките противници „сами се препознале“.
Размената на обвинувања меѓу власта и опозицијата продолжува во пресрет на интензивирањето на политичките активности, при што реториката околу употребата на терминот „талог“ стана нов повод за меѓусебни обвинувања.