Црногорската полиција трага по 30-годишниот руски државјанин Михаил Николаевич Шабунин, осомничен дека со огнено оружје убил тројца мажи на стрелиште во Даниловград, по што избегал вооружен, соопшти Управата на полицијата.
Полицијата предупреди дека осомничениот е вооружен, има муниција и претставува „активна закана“, а во потрагата се вклучени расположливите полициски сили. Воспоставени се блокади во поширокото подрачје на Подгорица.
Во нападот на стрелиштето „Чешка збројевка“ загинале Немања Капор (20) и Петар Глобаревиќ (24) од Подгорица и Момир Радоњиќ (67) од Даниловград, соопшти полицијата.
Црногорскиот премиер Милојко Спајиќ најави дека 1 и 2 септември ќе бидат прогласени за денови на жалост, а почетокот на учебната година во Даниловград ќе биде одложен за 3 септември.
Пукал откако претходно вежбал на стрелиштето
Директорот на Управата на полицијата Лазар Шќепановиќ изјави дека осомничениот бил идентификуван за кратко време и дека во претходните денови престојувал на стрелиштето.
Според првичните полициски информации, Шабунин во понеделникот најпрво извршил пробно гаѓање, а потоа влегол во објектот и отворил оган.
По убиствата, според полицијата, тој го напуштил местото со автомобил на една од жртвите.
„Станува збор за опасно лице кое со себе понело одредена количина муниција и огнено оружје. Потенцијална е опасност, активна е закана“, изјави Шќепановиќ.
Мотивот за нападот засега не е соопштен.
Пронајден автомобилот, осомничениот сè уште во бегство
Неколку часа по нападот полицијата го пронашла автомобилот „сеат кордоба“ за кој се сомнева дека Шабунин го користел при бегството.
Возилото било пронајдено на ливада во реонот на Врањске њиве, во близина на ресторан.
Пронаоѓањето на автомобилот ја префрли потрагата кон поширокото подрачје околу главниот град. Полицијата соопшти дека е ангажиран целиот расположлив состав и дека се воспоставени потесни и пошироки блокади.
Граѓаните се повикани да бидат особено внимателни, да не му се приближуваат на осомничениот доколку го забележат и веднаш да ја известат полицијата.
Претходно, додека траеше потрагата, полицијата ги повика жителите во загрозеното подрачје да останат во своите домови и да пријават сомнително однесување.
Три тела пронајдени на стрелиштето
Вишото државно обвинителство во Подгорица било известено околу 17:30 часот дека на стрелиштето биле пронајдени три тела.
Обвинителката Слаѓана Шпањевиќ Волков изјави дека бил извршен увид и дека трагите од местото на настанот ќе бидат предмет на вештачење.
Според информациите на RTCG од стрелачкиот клуб, тројцата загинати биле вработени во објектот.
Истрагата треба да утврди што му претходело на нападот, од каде осомничениот го набавил оружјето и муницијата и кој бил мотивот за тројното убиство.
Два дена жалост
Премиерот Спајиќ изјави дека е „длабоко потресен“ од убиствата и им изрази сочувство на семејствата на жртвите.
Тој рече дека е во комуникација со министерот за внатрешни работи и директорот на полицијата и дека очекува осомничениот да биде приведен во најкус можен рок.
Поради трагедијата, Владата ќе ги прогласи 1 и 2 септември за денови на жалост, а почетокот на учебната година во Даниловград ќе биде поместен за четврток, 3 септември.
Потрагата по Шабунин продолжува.