Демократската унија за интеграција (ДУИ) соопшти дека коалицијата ВЛЕН, иако според партијата влегла во Владата како изборен губитник, ги прекршила своите предизборни ветувања и станала „целосен инструмент“ на ВМРО-ДПМНЕ и на политиките што, како што наведува, го засилуваат влијанието на т.н. „српски свет“ во Северна Македонија.
ДУИ тврди дека две години по ред извештаите на Европскиот парламент предупредуваат на растечкото влијание на „српскиот свет“ во земјата и дека во нив се посочува промовирање на такви политики од претставници на власта.
„Тоа веќе не се оценки на опозицијата, туку констатации на најважните европски институции“, наведува ДУИ.
Партијата посочува дека меѓу примерите се политичката улога на министерот Иван Стоилковиќ, неговите јавни настапи, контактите со политички структури блиски до претседателот на Република Српска, Милорад Додик, договори во енергетскиот сектор со компании кои, според ДУИ, се поврзани со негови интереси, како и зголеменото присуство на српски банкарски капитал во земјата.
ДУИ исто така оценува дека паралелно со овие процеси продолжува, како што наведува, „систематското поткопување“ на Охридскиот рамковен договор преку одлуки на Уставниот суд и политики на актуелната влада.
„ВЛЕН не е набљудувач, туку камуфлирач, релативизатор и соучесник во политиките што ги нарушуваат колективните права на Албанците“, се наведува во соопштението.
Партијата додава дека ВЛЕН ветувала достоинство и заштита на националните интереси, но, според ДУИ, наместо тоа донела потчинетост и отстапување од предизборните ветувања.