Повеќе од еден милион луѓе се евакуирани во источна Кина откако моќниот тајфун „Долфин“ го погоди крајбрежјето, носејќи поројни дождови кои во Шангај достигнаа највисоко дневно ниво во повеќе од 150 години мерења.
Властите предупредија на опасност од поплави и свлечишта додека бурата се движи кон север и подлабоко во копното, иако во понеделникот ослабе во тропска бура.
Во Венџоу, крајбрежен град во провинцијата Џеџијанг, евакуирани се повеќе од 900.000 луѓе, а отворени се над 1.500 засолништа. Во соседната провинција Фуџијан од ризичните подрачја се преместени 98.900 луѓе.
Во Шангај до неделата вечерта биле евакуирани 215.600 жители.
Метеоролошка станица во централниот дел на Шангај измерила речиси 313 милиметри дожд за 24 часа до 7 часот во понеделникот, што е најголемото количество регистрирано во градот во повеќе од 150 години. На друга станица биле измерени речиси 400 милиметри.
Снимки објавени на кинеските социјални мрежи покажуваат поплавени улици, а на платформата Веибо почна да се шири фразата „Шангај се претвори во море“.
Просечните врнежи во Џеџијанг од петокот вечерта до понеделникот наутро достигнале 173 милиметри, надминувајќи ги нивоата забележани за време на некои претходни големи тајфуни.
Над 1.300 откажани летови
Невремето сериозно го наруши и сообраќајот. Двата аеродрома во Шангај откажаа повеќе од 1.300 летови, а дел од железничкиот и локалниот јавен превоз беше запрен.
Меѓународниот аеродром во Нингбо најави постепено обновување на операциите во понеделник, но предупреди дека и натаму се можни одложувања и откажувања.
Во Хангџоу во понеделникот беше обновена работата на метрото, откако дел од железничките линии беа запрени претходниот ден.
Кинеските власти го задржаа портокаловото предупредување за обилни врнежи. Во некои области до среда се очекуваат дополнителни 200 до 400 милиметри дожд, што го зголемува ризикот од поплави и свлечишта.
Последици и во други делови од Азија
„Долфин“ влијаеше и врз времето во поширокиот регион.
Во Хонг Конг во неделата беа измерени рекордни 36,9 Целзиусови степени, највисока температура досега регистрирана во градот.
Во Тајван беа прекинати траектните линии и откажани повеќе од 180 летови поради силниот ветер и врнежите.
Тајфунот претходно ја зафати и јапонската префектура Окинава, каде што беа повредени шест лица, а повеќе од 50.000 објекти останаа без електрична енергија.
На Филипините бурата не стигна директно до копното, но ги засили сезонските монсунски дождови и предизвика поплави во делови од островот Лузон, вклучително и во поширокото подрачје на Манила.
Научниците предупредуваат дека глобалното затоплување ја зголемува веројатноста за поекстремни временски појави, вклучувајќи и посилни тропски циклони.