Демократската унија за интеграција (ДУИ) оцени дека зголемувањето на цената на дизелот за повеќе од 20 проценти во последниот месец ќе доведе до нов бран поскапувања и дополнителен притисок врз животниот стандард.
Од партијата соопштија дека цената на дизелот се зголемила од 82,5 на 99,5 денари за литар, што, според нив, претставува раст од 20,6 проценти.
„Ова ќе значи поскап транспорт, поскапа храна, повисоки трошоци за земјоделците и бизнисите, како и нов притисок врз инфлацијата“, наведуваат од ДУИ.
Партијата тврди дека Владата не презела мерки за ублажување на последиците од растот на цените на горивата и ја споредува ситуацијата со, како што наведува, други европски земји кои интервенирале со намалување на акцизите, субвенции или други мерки за заштита на граѓаните.
ДУИ оценува дека последиците од повисоката цена на дизелот ќе ги почувствуваат домаќинствата и стопанството, бидејќи транспортните трошоци ќе се прелеат врз цените на производите и услугите.