Необична рекламна кампања на Нетфликс привлече толпи на булеварот „Сансет“ во Лос Анџелес, откако компанијата смести човек во целосно опремена дневна соба изградена во билборд висок околу девет метри.
Кампањата е дел од промоцијата на новиот научнофантастичен хорор „The Last House“, во кој главните улоги ги играат Грета Ли и Вагнер Моура.
Човекот престојува во мала просторија поставена во билбордот на раскрсницата на „Сансет булевар“ и „Селма авенија“. Тој почнал да живее таму во четвртокот и, според најавите на Нетфликс, треба да остане до сабота.
Облечен во пижами или бањарка, тој пие кафе и комуницира со луѓето на улицата преку бела табла на која ги пишува своите одговори.
Под прозорецот на импровизираната дневна соба стои пораката: „Колку долго можете да преживеете?“
На прашање од новинарите каков е погледот од билбордот, човекот на таблата напишал: „Спектакуларен“. На прашањето дали успева да спие, одговорил само: „Не“.
Просторијата има климатизација, што му овозможува да престојува во неа и за време на високите температури во Јужна Калифорнија. Не е објавено како се организирани неговата исхрана и пристапот до тоалет.
Необичната кампања предизвика реакции и на социјалните мрежи, каде што корисниците ја коментираат идејата човек да живее неколку дена во билборд среде еден од најпрометните делови на Лос Анџелес.
Рекламата директно ја пресликува приказната на филмот. „The Last House“, во режија на Луј Летерие, следи четиричлено семејство кое ненадејно останува затворено во својот дом и мора да преживее со ограничени ресурси додека се обидува да открие што го спречува да излезе.
Летерие рече дека филмот ја преиспитува идејата за домот како безбедно засолниште, претворајќи го во непријателска средина во која семејството мора да остане обединето за да преживее.
Филмот веќе е достапен на Нетфликс.