Речиси 2,2 милиони денари собрани на годинашниот Хуманитарен пикник на „Алкалоид“ ќе бидат наменети за набавка на современа медицинска опрема за Универзитетската клиника за респираторни заболувања кај децата „Козле“, соопшти компанијата.
Со средствата треба да биде набавен бронхолошки столб со фибербронхоскоп, кој се користи за дијагностицирање и третман на белодробни заболувања кај децата, како и при итни случаи кога дете ќе вдише туѓо тело.
Донацијата е резултат на 12. Хуманитарен пикник на компанијата.
Опрема за директен преглед на дишните патишта
Бронхолошкиот столб овозможува директен и прецизен преглед на дишните патишта со тенок и флексибилен инструмент опремен со оптички систем.
Тоа овозможува лекарите да ја прегледаат внатрешноста на дишните патишта и да интервенираат при одредени белодробни заболувања и итни состојби.
Особено значење има при сомневање дека дете вдишало туѓ предмет, состојба што може да бара брза дијагностика и интервенција.
Директорката на Клиниката „Козле“, проф. д-р Катерина Бошковска, рече дека новата опрема ќе придонесе за подобри услови за лекување на најмладите пациенти.
„Особено сме благодарни што ’Алкалоид’, кој како и многупати досега, ја препознава важноста на вложувањето во здравјето и создавањето подобри услови за лекување на најмладите пациенти“, изјави Бошковска.
Таа оцени дека ваквата поддршка создава конкретна и долгорочна вредност за здравствениот систем и за пациентите.
Речиси 14 милиони денари собрани досега
Хуманитарниот пикник на „Алкалоид“ започнал во септември 2011 година, кога компанијата одбележувала 75 години од своето постоење.
Првично бил замислен како корпоративна хуманитарна иницијатива за вработените, членовите на нивните семејства и пријателите, а со текот на времето прераснал во традиционален настан.
Континуитетот бил прекинат единствено за време на пандемијата на ковид-19.
Според податоците на компанијата, од првиот пикник досега се собрани близу 14 милиони денари.
Парите биле насочувани кон здравствени установи, хуманитарни и граѓански организации, деца, лица со ретки болести, ранливи категории и лица од третото доба, како и кон иницијативи за заштита на животната средина.
Донациите се реализираат преку Фондацијата „Трајче Мукаетов“, основана од „Алкалоид“ во 2007 година.
Мукаетов: Зад компанијата стојат луѓето
Генералниот директор и претседател на Управниот одбор на „Алкалоид“, Живко Мукаетов, рече дека годинашната акција ја продолжува традицијата на солидарност меѓу вработените.
„Особено ми е драго што годинашната донација е наменета за подобри услови за лекување на најмалите, зашто тоа е суштината на нашата мисија: здравјето пред сè“, рече Мукаетов, кој е и претседател на Фондацијата „Трајче Мукаетов“.
Според компанијата, годинашниот пикник е дел и од одбележувањето на 90-годишнината на „Алкалоид“.
На традиционалните маици за учесниците е употребен мотивот „Алкалоидовата куќа“, изработен од македонскиот артист Сатја Грабул по повод јубилејот.
Но најконкретниот резултат од годинашната акција ќе биде во „Козле“ – нова опрема наменета за дијагностика и третман на деца со респираторни заболувања и за интервенции во итни состојби.