Photo: AP
Вселенската патријаршија го поздрави договорот меѓу Грција и Бугарија за размена и враќање на историски верски и културни артефакти, оценувајќи дека тој може да биде пример и за други случаи на репатријација на културно наследство, вклучително и за мермерите од Партенон.
Пораката доаѓа во момент кога почнува враќањето на вредни верски и културни предмети што пред повеќе од еден век биле однесени од манастири и епархии во северна Грција.
Патријаршијата го опиша договорот како почеток на процес за враќање на предмети за кои смета дека биле одземени од Грција и изрази надеж дека процесот ќе заврши наскоро, во согласност со, како што наведе, „моралниот поредок“ и меѓународното право.
Вселенскиот патријарх Вартоломеј претходно го покренал прашањето при посета на Софија, каде што разговарал со тогашниот бугарски претседател, соопшти Патријаршијата.
Во соопштението, Вселенската патријаршија им честиташе на владите на Грција и Бугарија за веќе преземените чекори и за оние што треба да следуваат, нагласувајќи дека двете земји се соседи, сојузници и членки на Европската Унија.
Патријаршијата изрази надеж дека договорот ќе ги охрабри и другите држави да враќаат културни богатства во земјите од кои потекнуваат.
Како најпознат пример ги посочи скулптурите од Партенон, однесени од Атина во почетокот на 19 век, а денес во голем дел се чуваат во Британскиот музеј.
Патријаршијата го опиша Партенон како „симболичен споменик за целото човештво“ и повторно ја поддржа идејата неговите скулптури да бидат повторно обединети.
Договорот меѓу Грција и Бугарија е дел од поширок процес на размена и враќање на историски предмети меѓу двете држави.
Во истиот контекст се отвора и прашањето за посмртните останки што ѝ се припишуваат на цар Самуил, за кои грчките и бугарските власти со години разговараат.