Предвремените локални избори за градоначалник на Брвеница в недела ќе бидат повеќе од трка за управување со една рурална општина, бидејќи резултатот може да покаже како стојат политичките партии пред можни предвремени парламентарни избори и какви се односите меѓу сегашните коалициски партнери, јави „360 степени“.
Во првиот круг се натпреваруваат шест кандидати, а етничкиот состав на општината дополнително ја прави трката политички чувствителна.
Според податоците за резидентното население, Албанците сочинуваат 54,06%, а Македонците 45,38%.
И покрај тоа, на локалните избори во 2021 и 2025 година победи Јовица Илиевски, етнички Македонец, кој успеваше да добие поддршка и надвор од сопствениот етнички блок.
Илиевски ненадејно почина во јуни годинава, по што општината мораше да оди на предвремени избори.
Шест кандидати, една општина
Кандидатот на коалицијата предводена од ВМРО-ДПМНЕ, Стојанчо Радичевски, настапува со слоганот „Една Брвеница за сите“.
Во неговата програма се детски градинки, социјални проекти и продолжување на политиката на меѓуетничка соработка.
Кандидатот на СДСМ, Јовица Радески, како приоритети ги посочува фекалната канализација во Волковија, старечки дом во Челопек, пешачка и велосипедска патека и капела во Брвеница.
Јакуп Хусеини од ВЛЕН ја темели програмата на транспарентност, младински политики, економски развој, дијаспора и инфраструктура.
Аркин Јахији, кандидат на коалицијата предводена од ДУИ, предлага инвестиции во патишта, училишта, мостови и инфраструктурни проекти во повеќе населени места.
Во трката има и независни кандидати.
Жителите со кои разговараше „360 степени“ најчесто ги посочуваат инфраструктурата, комуналните проблеми, патиштата, училиштата и иселувањето на младите.
Во Челопек граѓаните зборуваат за празни куќи, недостиг од работа и потреба од подобри патишта и пристап до нивите.
Во Брвеница дел од жителите бараат подобро комунално уредување и продолжување на политиката на еднаков третман на сите етнички заедници.
Првиот круг како политичка анкета
Новинарот и аналитичар Џелал Незири за „360 степени“ оценува дека овие избори ќе имаат значење и надвор од самата општина.
Според него, првиот круг може да покаже колкав е реалниот рејтинг на секоја партија во момент кога во јавноста се споменува можноста за предвремени парламентарни избори напролет.
„Изборите во општина Брвеница треба да претставуваат еден вид одраз на реалната состојба на секоја партија одделно“, рече Незири.
Многу поголема политичка тежина може да има вториот круг.
Доколку во него влезат кандидати на ВМРО-ДПМНЕ и ДУИ, ВЛЕН би бил ставен пред избор дали да го поддржи кандидатот на својот коалициски партнер во централната власт.
Ако, пак, во вториот круг се соочат ВЛЕН и СДСМ, притисокот би бил врз ВМРО-ДПМНЕ да застане зад кандидатот на ВЛЕН.
Според Незири, ваквите комбинации ќе покажат колку се функционални сегашните коалициски односи, но можат да отворат и простор за нови политички партнерства.
Токму поради тесниот етнички баланс и распределбата на политичката поддршка, Брвеница може да стане индикатор за пошироките политички движења во земјата.
Првиот круг се одржува в недела, 18 октомври.