Француската алијанса во Тетово одбележа 25 години од основањето и отвори нови простории во кампусот на Универзитетот на Југоисточна Европа, отворајќи нова фаза во соработката во образованието, културата и франкофонијата.
На настанот присуствуваа претставници на институциите, академската заедница и партнери на Алијансата, како и амбасадорот на Франција во Северна Македонија, Кристоф Ле Риголер.
Пред церемонијата, ректорот на УЈИЕ Садудин Ибраими, проректорот за планирање, истражување и претприемништво Веланд Рамадани и советничката за односи со заедницата и меѓународни односи Беса Арифи се сретнаа со францускиот амбасадор.
Во фокусот на разговорите биле досегашната соработка и можностите таа да се прошири во областите на образованието, францускиот јазик, културата, мобилноста и меѓународната соработка.
Отворањето на новите простории на Француската алијанса во кампусот на УЈИЕ беше претставено како почеток на ново поглавје во односите меѓу двете институции.
Новата локација треба да создаде повеќе можности за промоција на францускиот јазик и култура, како и за поголемо вклучување на студентите во франкофонски и меѓународни активности.
Ректорот Ибраими го истакна придонесот на Француската алијанса во промоцијата на францускиот јазик и култура и во зајакнувањето на интеркултурниот дијалог и европските врски.
Настанот го отвори претседателот на Француската алијанса во Тетово, Авни Арифи, додека директорката Мимоза Цека направи пресек на 25-годишното работење на организацијата и нејзината улога во промовирањето на франкофонските вредности.
Во рамките на јубилејната програма беше организирана и културна програма, а поранешните директори на Алијансата испратија честитки преку видеопораки.
Со преместувањето во кампусот на УЈИЕ, Француската алијанса добива посилна институционална врска со универзитетската средина и можност за проширување на активностите кон студентите и академската заедница.