Поранешната британска министерка за финансии Рејчел Ривс повика на обновување на дебатата за враќање на Велика Британија во Европската Унија, оценувајќи дека Брегзит им нанел долгорочна економска и политичка штета на земјата.
Во своето прво позначајно јавно обраќање по заминувањето од Министерството за финансии, Ривс изјави дека Велика Британија треба повторно да го разгледа своето место во Европа.
„Никој во Министерството за финансии никогаш не се сомневаше какви се моите убедувања. Јас навистина верувам дека иднината на Британија е во Европската Унија“, напиша Ривс во авторски текст за весникот „Сандеј тајмс“.
Таа оцени дека застапниците на повторното членство мора да ги објаснат конкретните придобивки и да предложат внимателно осмислени чекори за приближување кон Унијата.
Нејзиниот повик претставува отстапување од официјалната позиција со која Лабуристичката партија настапи на парламентарните избори во 2024 година. Во тогашната изборна програма, партијата го исклучи враќањето во единствениот европски пазар, царинската унија и системот на слободно движење на луѓето.
Британскиот премиер Енди Бернам, сепак, неодамна изјави дека е потребна отворена и аргументирана расправа за идните односи со Европската Унија.
Според Бернам, секоја суштинска промена во британската политика кон Брисел би барала демократски мандат добиен на парламентарни избори, кои треба да се одржат најдоцна во 2029 година.
Опозициските конзервативци сметаат дека нема потреба повторно да се отвора дебатата за Брегзит, додека лидерот на партијата Реформска Велика Британија, Најџел Фараж, тврди дека владата нема мандат за поблиска интеграција со ЕУ.
Ривс, пак, смета дека приближувањето кон Брисел треба да започне со конкретни договори во областите што имаат непосредно влијание врз граѓаните и економијата.
Таа изрази надеж дека на претстојниот самит меѓу Велика Британија и Европската Унија ќе биде потврден договор за мобилност на младите, за кој се залагала уште додека била на министерската функција.
Дополнително, Ривс повика на напредок во преговорите за британско учество во европскиот одбранбен механизам САФЕ, воспоставен за поддршка на заедничките одбранбени капацитети на европските земји по руската инвазија врз Украина.
Одбранбениот договор постигнат меѓу Лондон и Брисел во мај минатата година отвори можност британските компании да учествуваат во проекти финансирани преку овој механизам.
Во својот текст Ривс се осврна и на економската политика, бранејќи ги одлуките што ги донела додека раководела со Министерството за финансии.
Таа оцени дека британските власти треба да бидат поодлучни во спроведувањето големи инфраструктурни проекти и пореално да ги проценуваат можностите и ризиците што ги носи вештачката интелигенција за развиените економии.
Изјавите на Ривс доаѓаат пред новата рунда разговори меѓу британските и европските претставници, на кои се очекува да се разгледуваат идните економски, безбедносни и политички односи.
Велика Британија формално ја напушти Европската Унија на 31 јануари 2020 година, по референдумот од 2016 година на кој мнозинството гласачи се изјаснија за излез од блокот.