Претседателот на Србија, Александар Вучиќ, ги отфрли обвинувањата дека специјалните единици „Кобри“ користеле звучен топ за време на вчерашните протести во Белград, тврдејќи дека станува збор за „срамни лаги“ и дека во прашање била антидрон пушка.
„Посебно сакам да истакнам дека обвинувањата за употреба на звучен топ се срамни. Она што се гледа на снимките е антидрон пушка, а не никакво средство за контрола на масата“, изјави Вучиќ во обраќањето до јавноста.
Тој додаде дека, и покрај „огромната негативна енергија и гнев“ за време на протестот, немало жртви ниту тешко повредени.
Според Вучиќ, 56 лица побарале медицинска помош – 44 во Ургентниот центар, 11 на Клиничко-болничкиот центар „Звездара“, и едно во болницата во Земун.
„Најтешко повредениот беше вклучен во меѓусебна тепачка меѓу демонстранти на Трг Никола Пашиќ. Иако формално неговите повреди се класифицирани како тешки, неговиот живот не е загрозен“, рече претседателот.
Вучиќ соопшти дека 22 лица се уапсени поради кривични дела против имотот, истакнувајќи ја улогата на полицијата во одржувањето на редот:
„Се гордеам на нашата полиција и безбедносни служби кои овие денови направија голема работа, осигурувајќи ја безбедноста на сите учесници. Не само што не користевме прекумерна сила – ние денес не кренавме ниту пендрек“, нагласи тој.
Протестите, организирани од студентски движења и опозициски групи, се одржаа пред српското Собрание и на плоштадот Славија, каде демонстрантите одржаа говори, запеаја химна и запалија бакли.