Премиерот на Северна Македонија, Христијан Мицкоски, во пораката по повод Денот на македонската полиција изјави дека „во државата нема веќе место за врски, непотизам и заштита од одговорност“, додавајќи дека законот мора да важи подеднакво за сите, без разлика дали станува збор за граѓани, функционери или бизнисмени.
„Се сеќаваме и не смееме да заборавиме како изгледаше секојдневието пред неколку години – криминалците слободно се шетаа, државата молчеше, а граѓаните живееја со чувство на немоќ“, напиша Мицкоски на Фејсбук.
Тој нагласи дека борбата против криминалот мора да се води со целосна посветеност, „со вистински партнери и со чисти раце“, и порача дека владата, институциите и општеството се решителни да стават крај на неказнивоста.
„Вашата мисија е света – да чувате поредок, но и да ја вратите довербата кај народот“, им порача Мицкоски на припадниците на полицијата.
Премиерот им го честиташе Денот на македонската полиција, порачувајќи дека неправдата нема простор пред „чесната, решителна и модерна полиција“.