Коалицијата ВЛЕН го обвини поранешниот министер за надворешни работи Бујар Османи дека за време на неговиот четиригодишен мандат се сретнал 11 пати со српски претставници во Белград, но ниеднаш не ја посетил Приштина.
Реакцијата следи еден ден по официјалната објава на кандидатурата на Османи за градоначалник на општина Чаир во Скопје.
„Во Скопје го пречека и рускиот министер Сергеј Лавров, а редовно беше дел од ‘кореографијата’ на прошетки и вечери со Александар Вучиќ. На Албанците им понуди само селфи дипломатија, блокирани европски интеграции и самопромоција“, соопштија од ВЛЕН.
Од коалицијата велат дека Османи бил поприсутен во кругови на српската дипломатија отколку меѓу граѓаните на Чаир.
„Не помогна никому, не беше присутен при изградба на училишта, булевари или детски градинки во Чаир. Не се јавуваше на телефон и не даде поддршка на локалните иницијативи“, велат од ВЛЕН.
Според соопштението, Османи се водел исклучиво од лични интереси и амбиции за останување на политичката сцена.
„Фактот дека за време на еден мандат се сретнал повеќе пати со Белград отколку со Приштина, зборува јасно за тоа дека Бујар Османи заборавил од каде доаѓа и кои се неговите луѓе“, наведуваат од ВЛЕН.