Поранешниот министер за здравство Арбен Таравари ја обвини коалициската платформа ВЛЕН дека ја попречувала постапката за вработување на медицински сестри во Клиничката болница во Тетово, инсистирајќи на партиски вработувања.
„Причините зошто ја напуштив оваа Влада стануваат сè појасни. Еден болен случај е оној на медицинските сестри во Тетово кои се без решение и без плата,“ напиша Таравари на Фејсбук.
Изјавата доаѓа еден ден по протестот на над 100 медицински сестри и технички персонал во Тетовската болница, кои бараат решавање на нивниот работен статус.
Телевизијата Алсат објави дека поседува интерен е-маил од Министерството за здравство, со кој Таравари – на самиот почеток од својот мандат како министер – издал наредба за прекин на сите постапки за вработување во јавните здравствени установи, вклучително и во Тетово.
Во дописот, датиран на 24 јуни минатата година, пишува:
„Министерството за здравство Ве информира дека сите активности поврзани со вработувањата се прекинуваат привремено, без разлика на фазата во која се наоѓаат.“
Само неколку дена по испраќањето на овој документ, Таравари ја посети Клиничката болница во Тетово и јавно вети решавање на статусот на долгогодишно ангажираните вработени со договори.
„Во Тетово постојат апарати, но човечките ресурси се недоволни. Овие лица со договори треба што поскоро да добијат решенија,“ изјави тогаш Таравари.
Директорот на болницата, Агим Бериша, потврди за Алсат дека во 2023 година добиле наредба од Министерството со која се прекинуваат сите процедури за нови вработувања.
Протестите на здравствените работници во Тетово продолжуваат, со барање за итно решавање на нивниот статус и исплата на заостанатите плати.