Министерот за надворешни работи и надворешна трговија на Северна Македонија, Тимчо Муцунски, денеска во Блед изјави дека интеграцијата на Западен Балкан е од суштинско значење за стабилноста и напредокот на Европската Унија.
Говорејќи на работен појадок со министрите за надворешни работи од регионот и специјалните пратеници за проширување на ЕУ, на покана на словенечката министерка Тања Фајон, Муцунски нагласи дека глобалните кризи ја зголемуваат потребата од европска кохезија.
„Нашата стабилност е европска стабилност. Нашиот напредок е европски напредок,“ изјави тој, додавајќи дека Северна Македонија останува посветена на реформите и на Планот за раст на ЕУ.
Муцунски предупреди дека процесот на проширување не смее да биде заложник на билатерални спорови или идентитетски прашања, бидејќи тоа, како што рече, би го поткопало кредибилитетот на целата ЕУ агенда.
Тој ја истакна важноста на регионалната соработка и улогата на европските специјални пратеници во задржувањето на вниманието кон Балканот.
„Веруваме во дијалог, во фер компромис и во визија за обединета, стабилна и просперитетна Европа со Западен Балкан во нејзиното јадро,“ заклучи македонскиот министер.