Премиерот Христијан Мицкоски денеска изјави дека пожарите кои го зафатија Скопје и други региони се ставени под контрола и ги отфрли обвинувањата на опозицијата како „невистини и обид за собирање политички поени“.
За време на посетата на Куманово, Мицкоски рече дека експертите предвидувале дека пожарот во депонијата во Трубарево ќе трае најмалку една недела, но бил изгаснат за помалку од 30 часа.
Тој додаде дека властите идентификувале околу дваесетина лица за кои постои сомневање дека стојат зад подметнувањето на дел од пожарите. „Ако направите анализа, ќе видите кому му одговараат овие настани,“ изјави премиерот.
Мицкоски најави законски измени со кои подметнувањето пожар ќе се третира како тероризам, а за создавање диви депонии ќе се предвидат казни над пет години затвор.
Опозициската СДСМ побара оставки од министрите за здравство и за внатрешни работи, тврдејќи дека не презеле навремени мерки за заштита на граѓаните и ја нарече ситуацијата „еколошка катастрофа“.
Претседателката Гордана Сиљановска Давкова сè уште нема свикано седница на Советот за безбедност, а дел од членовите изјавија дека не биле консултирани околу тоа прашање.