Холандската полиција соопшти дека се соочила со „невидено ниво на насилство“ за време на новогодишната ноќ, при што полицајци и пожарникари биле гаѓани со огномети и експлозивни направи низ целата земја.
Во Амстердам, историската црква Вонделкерк од 19 век беше зафатена од голем пожар во раните утрински часови на Нова година. Причината за пожарот сè уште не е утврдена, соопштија властите. Се урнал дел од кулата висока околу 50 метри, а покривот бил сериозно оштетен, иако се очекува главната конструкција да остане стабилна.
Претседателката на Холандскиот полициски синдикат, Нине Којман, изјави дека за време на дежурството во Амстердам била гаѓана со огномети и други експлозиви, оценувајќи дека нивото на насилство било без преседан.
Напади врз полицијата и противпожарните служби беа пријавени низ целата земја. Во јужниот град Бреда, врз полицијата биле фрлани молотови коктели, додека во Ротердам очната болница соопшти дека згрижила 14 пациенти со повреди на очите, од кои 10 биле малолетници. Двајца пациенти биле оперирани.
Локалните медиуми објавија дека 17-годишно момче од Најмеген и 38-годишен маж од Алсмер загинале во инциденти поврзани со огномети.
Вонделкерк, изградена во 1872 година и сместена покрај најголемиот градски парк Вонделпарк, е значајна туристичка атракција. Црквата е проектирана од архитектот Пјер Кајперс, познат и по дизајнот на музејот Рајксмузеум.
Забраната за неофицијални огномети треба да стапи на сила во 2026 година. Според Холандската пиротехничка асоцијација, оваа година за огномети биле потрошени рекордни 129 милиони евра.