Синоќа се одржа отворањето на четвртата Балканска школа за педијатри, настан кој обезбедува простор за размена на знаења, искуства и професионални контакти меѓу стручњаците посветени на здравјето на децата, соопшти министерот за здравство, Азир Алиу.
Алиу истакна дека педијатријата е една од најодговорните и најхумани области во медицината, додавајќи дека грижата за најмладите претставува и професионална и општествена одговорност. Министерот нагласи дека Владата останува фокусирана на подобрување на условите во педијатриските оддели, модернизација преку набавка на нова медицинска опрема и зајакнување на човечките ресурси.
„Свесни сме дека без стручен, мотивиран и поддржан кадар, нема да може да постои силен и одржлив здравствен систем“, рече Алиу. Тој додаде дека во последниот период се одобрени 17 специјализации по педијатрија за јавните здравствени установи, а дополнително се вработени 15 приватни специјализанти, дел од кои се ангажирани во Универзитетската клиника за педијатрија.
Министерот подвлече дека ваквите настани се важни за следење на современите текови во медицината и за унапредување на квалитетот на здравствената заштита за децата.