Француски војник кој служел во мировната мисија во јужен Либан е убиен, а тројца се ранети, соопшти францускиот претседател Емануел Макрон, додавајќи дека првичните индиции укажуваат на вмешаност на групата Хезболах, поддржана од Иран.
Мисијата на Обединетите нации во Либан (УНИФИЛ) соопшти дека започнала истрага откако нејзина патрола била нападната со огнено оружје од „недржавни актери“ во селото Гандурија, во јужниот дел на земјата.
„Еден мировник им подлегна на повредите, додека тројца се ранети, од кои двајца потешко“, се наведува во соопштението на УНИФИЛ, додавајќи дека повредените се префрлени во медицински установи.
Според првичните проценки на мисијата, нападот најверојатно бил извршен од недржавни актери, за кои се сомнева дека се поврзани со Хезболах.
Макрон, во објава на платформата X, ги повика либанските власти да преземат мерки против одговорните за нападот.
УНИФИЛ го осуди „намерниот напад“ врз мировниците, истакнувајќи дека таквите дејствија претставуваат сериозно прекршување на меѓународното хуманитарно право и на Резолуцијата 1701 на Советот за безбедност на ОН.
Мисијата, исто така, ја повика либанската влада итно да покрене истрага и да ги изведе сторителите пред лицето на правдата.