Советниците на СДСМ во Општина Кисела Вода побараа итно свикување на вонредна седница на Советот и преземање на мерки по трагедијата на градилиште, во која загина еден работник, а неколкумина беа повредени.
Во соопштението, тие изразија сочувство до семејството на загинатиот и посакаа брзо закрепнување на повредените.
„Оваа трагедија не смее да биде само уште една вест што ќе помине без одговорност. Таа отвора сериозни прашања за безбедноста на градежните активности и почитувањето на прописите“, се наведува во реакцијата.
Советниците соопштија дека поднеле барање за вонредна седница, на која ќе предложат конкретни мерки, вклучително и формирање независна стручна комисија за проверка на сите издадени одобренија за градба на територијата на општината.
Тие бараат и воведување привремен мораториум на градежните активности сè додека не се утврди дека се безбедни и во согласност со законските прописи, како и целосна транспарентност преку јавно објавување на сите документи и дозволи поврзани со градбите.
Дополнително, предложени се мерки за заштита на граѓаните, вклучително и проценка на ризик и евентуална евакуација на лица и објекти во опасност, како и обезбедување помош за погодените.
„Ова не е прашање на политика, туку прашање на безбедност и човечки животи“, истакнуваат советниците.
Тие повикаа седницата да се одржи без одложување и да резултира со конкретни чекори што ќе гарантираат поголема безбедност на сите градилишта во општината.