Албанскиот премиер Еди Рама предизвика реакции откако во говор по повод 35-годишнината на Социјалистичката партија изјави дека меѓу учесниците на неодамнешните протести во Тирана имало и лица од Косово и Тетово.
Говорејќи за демонстрациите поврзани со контроверзните развојни проекти во Валона, Рама рече дека „различни сили фрлаат камења на булеварот“, додавајќи дека меѓу нив имало и луѓе од Косово и Тетово кои, според него, „ја кријат раката“, слично како опозицијата.
Премиерот оцени дека протестите би можеле да влијаат врз туристичката сезона во Валона поради откажување резервации, но истовремено изрази разбирање за младите демонстранти.
„Имам симпатии за младите кои мислат дека прават револуција“, рече Рама, обвинувајќи ја опозицијата и помалите политички партии дека се обидуваат политички да профитираат од протестите.
Изјавата предизвика реакција кај функционери на коалицијата ВЛЕН во Северна Македонија. Членот на претседателството на ВЛЕН, Аднан Азизи, преку социјалните мрежи го доведе во прашање споменувањето на Косово и Тетово во контекст на протестите.
„Што му стана сега со Косоварите и Тетовците?“, напиша Азизи.
Остро реагираше и професорот по уставно право на УЈИЕ, Јетон Шасивари, кој во авторски текст оцени дека Рама се обидува да ја префрли одговорноста за внатрешните политички проблеми врз надворешни фактори.
„Кога граѓаните се креваат против основани сомнежи за галопирачка корупција во проектите во Валона, Рама веднаш го пронаоѓа надворешниот непријател“, напиша Шасивари.
Тој направи паралела со комунистичкиот период во Албанија, наведувајќи дека „Енвер Хоџа гледал диверзанти со падобрани, додека Еди гледа Тетовци и Косовари со камења во џебовите“.
Според Шасивари, „нема ништо покомунистичко од тоа за надворешен непријател да се прогласи секој што се осмелува да ги доведе во прашање тајните тендери и аферите што мирисаат на кражба“.
Во текстот тој прашува и зошто токму Косово и Тетово биле издвоени во говорот на Рама.
„Ненормално е еден албански премиер да ги напаѓа Тетово и Косово за да ги брани сомнителните афери во Валона“, наведува Шасивари.
Тој додава дека „туризмот не го уништуваат протестите на чесните граѓани, туку корупцијата, перењето пари и антинационалните балкански сојузи“.
Протестите во албанската престолнина се одржуваат во услови на засилени политички тензии околу урбанистичките и туристичките проекти на јадранското крајбрежје, додека владата тврди дека тие се клучни за економскиот развој на земјата.