Силното невреме што го погоди Куманово остави зад себе поплавени домови, подруми и деловни објекти, повторно отворајќи ги прашањата за капацитетот на атмосферската канализација и отпорноста на градската инфраструктура на екстремни временски услови.
Според Регионалниот центар за управување со кризи, најголем дел од пријавите се однесувале на навлегување вода во станбени и деловни објекти, при што на одредени локации нивото на водата во подрумите достигнало и до еден метар.
Најпогодени биле улиците „Моша Пијаде“, „Бајрам Шабани“, „Веселин Маслеша“, „Гоце Делчев“ и „11 Октомври“, како и булеварите „Октомвриска револуција“ и „Трета МУБ“. Интервенции биле извршени и на улицата „ЈНА“, во близина на трговски центар, каде спасувачките екипи работеле на отстранување на последиците од надојдените води.
Во текот на ноќта, во справувањето со кризата биле ангажирани екипи на Територијалната противпожарна единица, јавните претпријатија „Чистота и зеленило“ и „Водовод“, како и екипи на електродистрибутивната компанија. Службите вршеле испумпување вода, расчистување на наносите и нормализирање на состојбата.
По повлекувањето на водата, започнати се активности за чистење на улиците од кал, песок и чакал, како и за прочистување на шахтите и атмосферските канали. На локациите каде што дошло до излевање на фекалната канализација, спроведени се дополнителни мерки за миење и дезинфекција.
Градоначалникот на Куманово, Максим Димитриевски, најави продолжување на активностите за целосно расчистување на погодените подрачја и санација на оштетената инфраструктура.
Жителите на погодените населби, пак, повторно предупредија дека секој пообилен дожд ги открива истите слабости на градската атмосферска мрежа и побараа долгорочни инфраструктурни решенија.
Според официјалните податоци, најголеми количества врнежи во текот на невремето биле измерени во скопско Црешево, каде наврнале 74 литри дожд на квадратен метар, додека Куманово беше меѓу најпогодените градови од невремето во земјата.