Европската комисија во вторникот усвои нова комуникација за Европскиот столб на социјални права, потврдувајќи дека тој останува главен инструмент на Европската унија за заштита на граѓаните во услови на технолошки промени, економски притисоци и демографски предизвици.
Комисијата идентификува три приоритетни области за понатамошна акција: намалување на трошоците за живот, подготовка на пазарот на труд за влијанието на вештачката интелигенција и намалување на нееднаквоста.
„Нашиот социјален модел е една од нашите најголеми предности. Европскиот столб на социјални права е нашиот компас – го поставува курсот кон посилна социјална Европа која ги штити, ги зајакнува и ги поддржува граѓаните“, изјави претседателката на Европската комисија Урсула фон дер Лајен.
Во делот за трошоците за живот, Комисијата најави продолжување на мерките за намалување на ризикот од сиромаштија и подобрување на пристапот до основните услуги, нагласувајќи дека квалитетните работни места и повисоките минимални плати се клучен одговор на економските притисоци врз домаќинствата.
Комисијата исто така започнува консултации со европските социјални партнери за можни нови мерки за активирање на лицата кои се соочуваат со значителни пречки при вработување.
Во однос на вештачката интелигенција, Брисел предупредува дека таа носи големи можности за продуктивност и економски раст, но и нови ризици за работните места, образованието и социјалната вклученост. Поради тоа ќе биде формирана нова висока експертска група која ќе го следи влијанието на ВИ врз пазарот на труд.
Комисијата најави и дополнителни мерки за намалување на нееднаквоста, меѓу кои поддршка за малите и средни претпријатија при спроведувањето на Директивата за транспарентност на платите, новата иницијатива „Право да се остане“ и новата Стратегија за млади по 2027 година.
Подоцна оваа година Европската комисија ќе го претстави и Законот за квалитетни работни места, како и нови индикатори за мерење на квалитетот на работата во ЕУ.