СДСМ соопшти дека најавеното поскапување на горивата во регионот ќе има последици и врз македонските граѓани, обвинувајќи ја Владата дека не презема мерки за заштита на животниот стандард.
Од партијата посочуваат дека во Хрватска веќе се ограничува точењето гориво во пресрет на најавениот раст на цените и прашуваат дали премиерот Христијан Мицкоски повторно ќе ги повика граѓаните од соседните земји да точат гориво во Македонија.
СДСМ тврди дека минатогодишното намалување на ДДВ за горивата ја претворило Македонија во „бензинска пумпа за регионот“, при што, според нив, државниот буџет изгубил значителни приходи без долгорочна корист за домашните граѓани.
Во соопштението се наведува дека инфлацијата продолжува да ги намалува реалните приходи, потрошувачката кошничка поскапува, минималната плата и пензиите не го следат растот на цените, а земјоделците се соочуваат со повисоки трошоци за гориво, ѓубрива и репроматеријали.
Опозициската партија тврди и дека за две години Владата ја зголемила задолженоста на државата за околу 2,5 милијарди евра, дека странските инвестиции се намалиле за повеќе од 60 проценти, а европскиот интегративен процес е блокиран, што, според СДСМ, ја ограничува можноста за користење на европските фондови.
„Повисоки цени, пониски реални приходи, поголем долг, помалку инвестиции и изолација“, наведува СДСМ, оценувајќи дека економската политика на Владата носи краткорочни политички поени, но долгорочни последици за економијата и животниот стандард на граѓаните.