Европската Унија ја стави криптовалутната берза HTX на листата санкционирани субјекти како дел од најновиот пакет мерки насочени кон ограничување на финансиските канали што, според Брисел, ѝ помагаат на Русија да ги заобиколува меѓународните санкции, јави Ројтерс.
HTX, поранешна Huobi, е една од најголемите светски платформи за тргување со криптовалути. Контролниот удел во компанијата во 2022 година го презеде милијардерот со седиште во Хонг Конг, Џастин Сан.
Според Европската Унија, HTX е една од 18 компании што обезбедуваат криптоуслуги и наводно им помогнале на руски субјекти да ги избегнуваат санкциите воведени поради војната во Украина.
Новиот пакет санкции опфаќа банки, криптовалутни мрежи, трговци со нафта, таканаречената „флота во сенка“ и извори на приходи од рускиот енергетски сектор.
HTX не одговори веднаш на барањето на Ројтерс за коментар.
Берзата веќе беше санкционирана од Обединетото Кралство во мај годинава, во рамки на мерките против, како што Лондон ги нарече, „сенковите финансиски системи“ што ја поддржуваат руската воена економија.
За разлика од британските мерки, санкциите на Европската Унија не претставуваат целосно санкционирање на компанијата и не вклучуваат замрзнување на имотот.
По британските санкции, HTX соопшти дека усогласеноста со регулативите останува нејзин „апсолутен приоритет“ и дека ги почитува законските рамки во сите држави во кои работи.
Џастин Сан беше меѓу најистакнатите инвеститори во криптопроектот World Liberty Financial, основан од американскиот претседател Доналд Трамп и неговите синови, иако, според Ројтерс, односите меѓу страните подоцна се влошиле.