Локалното население на неколку грчки острови сè почесто одлучува да не ги споделува јавно своите омилени плажи, извори, таверни и традиционални прослави, стравувајќи дека масовниот туризам и социјалните мрежи неповратно го менуваат нивниот карактер.
Весникот „Катимерини“ наведува дека традиционалните панигири – верски прослави со храна, вино и народна музика – на островите како Сифнос и Икарија се претвораат во туристички атракции, при што локалците велат дека духовната и културната вредност постепено исчезнува.
„На последната прослава имаше десетина локални жители, дваесетина Атињани и стотици странски туристи. Луѓето доаѓаат за бесплатната храна и вино, а не поради традицијата“, вели жител на Сифнос.
Музичари од островот предупредуваат дека посетители сè почесто бараат дополнителна храна и алкохол, без да покажат разбирање за доброволниот труд на организаторите и верскиот карактер на настаните.
Слични забелешки доаѓаат и од Икарија, каде локалците велат дека нивните традиционални собири веќе личат на масовни забави, а наместо локални производи се служат индустриски замрзнати производи.
Поради тоа, многумина престануваат да ги објавуваат своите омилени места на социјалните мрежи.
Новинарката Ирени Какулиду вели дека денес намерно не ги открива локациите на скриените плажи или природни убавини што ги посетува.
„Оди, уживај, но не мора да објавиш сè“, е нејзината порака.
Сличен став има и готвачката Ставриани Зервакаку од полуостровот Мани, која вели дека без проблем ќе препорача ресторан, но не и помалку познати природни места.
И жителите на Ханија на Крит стануваат повнимателни. Наместо да ја означат точната локација на некоја плажа, тие објавуваат само фотографии со опис „рај“, без географски податоци.
Според нив, местата што до неодамна ги посетувале само локалци денес, по едно вирално видео или објава, се преполни со стотици туристи.
Локалците предупредуваат дека прекумерната изложеност на „скриените бисери“ преку инфлуенсери и социјалните мрежи не само што ја уништува автентичноста на дестинациите, туку го менува и секојдневниот живот на жителите во екот на туристичката сезона.