Албанскиот министер за внатрешни работи Бесфорт Ламалари изјави дека Валон Бела и Бекир Халими се прогласени за непожелни лица во Албанија за период од 10 години, по консултации со безбедносните агенции и врз основа на информации поврзани со нивните активности.
Во интервју за „Тирана лајв“ на ABC News, Ламалари рече дека одлуката е донесена на 17 јули и дека предвидува нивно протерување и забрана за влез во земјата во следната деценија.
„Врз основа на сите пристигнати информации за активностите на овие две лица беше создадена основа да бидат прогласени за непожелни во Албанија. Одлуката ја донесов на 17 јули и оценив дека е оправдано тие да бидат протерани и да им биде забранет влез во период од 10 години“, изјави Ламалари.
Тој додаде дека пред донесувањето на одлуката биле спроведени консултации со безбедносните агенции.
„Колку повеќе се приближуваме до европското семејство, толку повеќе мора да се однесуваме како земја-членка и да не дозволиме никаква агенда насочена против нашата држава. Станува збор за ограничени безбедносни информации и континуирано следење од надлежните служби“, рече министерот.
Ламалари нагласи дека не се двоуми да носи вакви одлуки кога, како што рече, станува збор за заштита на националниот интерес.
Осврнувајќи се и на актуелните протести во Албанија, министерот оцени дека тие биле злоупотребени од, како што рече, „непријателски земји“ и додаде дека полицијата ќе продолжи да го гарантира јавниот ред и безбедност, без да дозволи поттикнување насилство.