Седум нови случаи на инфекција со вирусот Западен Нил се регистрирани во Северна Македонија во текот на оваа недела, а тројца пациенти се во критична состојба и се интубирани, соопшти Министерството за здравство.
Сите седум новорегистрирани случаи се од Скопје. По два случаи се регистрирани во општините Кисела Вода и Гази Баба, а по еден во Илинден, Бутел и Аеродром.
Новите случаи доаѓаат во период на зголемена циркулација на вирусот во земјата и регионот. Претходно Институтот за јавно здравје информираше за осум потврдени случаи во земјата, сите со тешка, невроинвазивна форма на болеста.
Западнонилската треска се пренесува главно преку убод од заразен комарец. Кај околу 80% од заразените инфекцијата поминува без симптоми, што значи дека бројот на инфекции може да биде значително поголем од бројот на лабораториски потврдени случаи.
Кај помал дел од заразените се јавуваат температура, главоболка, замор, болки во мускулите и други симптоми, додека кај помалку од 1% инфекцијата може да премине во тешка невроинвазивна форма, како менингитис или енцефалитис. Повозрасните лица и луѓето со хронични заболувања или ослабен имунитет се изложени на поголем ризик од компликации.
Зголемување на бројот на случаи е регистрирано и во соседството. Во Србија се потврдени првите два случаи годинава, додека во Грција здравствените власти пријавија раст на бројот на инфекции.
Здравствените власти препорачуваат употреба на репеленти, заштитна облека и мрежи на прозорците, како и отстранување на застојаната вода околу домовите, каде што се размножуваат комарците.