Прва група македонски граѓани кои побараа евакуација од Израел поради влошената безбедносна состојба, синоќа безбедно пристигна на скопскиот аеродром, соопштија надлежните институции.
Македонија е меѓу првите европски земји кои организираа и спроведоа успешна евакуација на свои државјани од конфликтната зона на Блискиот Исток. Според податоците до понеделник, вкупно 28 македонски државјани побарале поддршка за напуштање на Израел.
Министерството за надворешни работи информираше дека веднаш по ескалацијата на состојбата формирало кризен штаб и започнало координирани активности за безбедно враќање на граѓаните.
Евакуацијата беше извршена со авион во државна сопственост, со оглед дека меѓународниот воздушен сообраќај со Израел е привремено суспендиран. Втора група македонски државјани ќе биде евакуирана веднаш штом се воспостават редовни летови од Тел Авив.