Земјите од Западен Балкан мора да ја забрзаат размената на информации и регионалната соработка во борбата против организираниот криминал, изјави во средата генералниот секретар на Советот за регионална соработка (RCC), Амер Капетановиќ, предупредувајќи дека криминалните мрежи веќе функционираат преку националните граници.
Капетановиќ се обрати на состанокот на министрите за внатрешни работи во рамки на Берлинскиот процес, што се одржа на 15 и 16 септември во Подгорица, во рамки на црногорското претседавање со иницијативата.
„Секоја пратка запрена во нашиот регион е пратка што нема да мора да биде запрена во Виена, Берлин, Париз или Лондон“, рече Капетановиќ.
„Криминалците соработуваат преку нашите граници без заеднички соопштенија. Да соработуваме барем исто толку брзо“, додаде тој.
На состанокот учествуваа претставници на шесте економии од Западен Балкан, Европската комисија и други партнери, а првата сесија, посветена на зајакнувањето на отпорноста кон организираниот криминал, ја водеше црногорскиот министер за внатрешни работи Данило Шарановиќ.
Капетановиќ повика институциите подобро да ги користат регионалните податоци за идентификување на безбедносните слабости и да посветат поголемо внимание на пристаништата, транспортните и логистичките мрежи.
Посебен ризик, според него, претставуваат таканаречените инсајдерски закани – можноста криминалните групи да користат лица внатре во институциите или логистичките системи – како и недоволната поврзаност меѓу кадровската, информациската и дигиталната безбедност.
Капетановиќ се повика и на последното истражување SecuriMeter на RCC, според кое 81% од анкетираните граѓани сметаат дека корупцијата е широко распространета, додека загриженоста за организираниот криминал изнесува 72%.
Податоците го нагласуваат јазот меѓу напорите на владите за побрза економска интеграција на регионот и потребата истите транспортни и трговски коридори да бидат заштитени од криминални мрежи.
Токму поголемата мобилност на луѓе и стоки бара поблиска соработка меѓу полицијата, царинските служби и приватните логистички оператори, рече Капетановиќ.
RCC како пример го посочува регионалниот Патоказ за контрола на мало и лесно оружје и соработката со SEESAC, преку кои земјите од регионот веќе развиваат заеднички механизми за справување со ризиците од нелегалното оружје.
На состанокот учествуваше и државниот секретар во македонското Министерство за внатрешни работи Сашо Петрушевски, заедно со претставници од другите земји од Западен Балкан и Европската комисија.
Берлинскиот процес, започнат во 2014 година, ги поврзува земјите од Западен Балкан со членките на ЕУ во области како регионалната соработка, економското поврзување, безбедноста и европската интеграција.
RCC најави дека разговорите за безбедносните слабости ќе продолжат на Регионалната безбедносна конференција JUMBO во Тирана во ноември, каде институциите и партнерите треба да утврдат каде остануваат најголемите празнини и во кои области е потребна посилна регионална координација.