Бугарскиот европратеник Кристијан Вигенин изјави дека Софија не треба да прави нови отстапки во односите со Северна Македонија, оценувајќи дека бугарската позиција има широка политичка и јавна поддршка и дека Скопје треба да ги исполни веќе преземените обврски во процесот на европска интеграција.
„Нема место за нови отстапки од Бугарија во однос на Северна Македонија, затоа што веќе направивме доволно“, рече Вигенин во интервју за бТВ.
Тој додаде дека не очекува меѓународен притисок да ја промени позицијата на Софија и рече дека евентуален притисок од САД повеќе би бил насочен кон Северна Македонија да ги исполни обврските поврзани со евроинтеграцијата.
„Тоа е единствениот начин да се забрза нејзиното пристапување кон ЕУ“, рече Вигенин.
Вигенин: Обврските се кон ЕУ, не кон Бугарија
По неодамнешната посета на Северна Македонија, Вигенин оцени дека во земјата се создава атмосфера во која политичарите што се залагаат за спроведување на договорените чекори се изложени на критики.
„Тие обврски не се кон Бугарија, туку кон Европската Унија“, рече Вигенин.
Тој ја насочи критиката кон премиерот Христијан Мицкоски, велејќи дека доколку договореното било спроведено, процесот на пристапување ќе бил значително понапреднат.
Вигенин претходно во Скопје изјави дека на Бугарија и Северна Македонија не им е потребен посредник во разговорите за евроинтеграцијата, бидејќи прашањето веќе е поставено во европска рамка.
Софија останува на ставот дека нов посредник не е потребен
Изјавата на Вигенин доаѓа во момент кога Владата во Скопје бара поголемо вклучување на ЕУ, а премиерот Мицкоски ја спомена и можноста за присуство на НАТО во идните разговори со Бугарија.
Македонската страна го образложува ваквиот предлог со потребата аргументите на двете страни да бидат слушнати во поширок европски формат и да се обнови довербата.
Од Софија, пак, во последните денови повеќепати беше повторено дека процесот веќе се одвива во рамките на ЕУ и дека фокусот треба да биде ставен на исполнување на договорените обврски.
Вигенин рече дека не очекува американски притисок врз Бугарија за промена на позицијата.
Според него, доколку има посилно американско вклучување, тоа би било насочено кон забрзување на исполнувањето на обврските од страна на Северна Македонија.
Неговата изјава следува во период на засилена дипломатска активност околу проширувањето на ЕУ и нови пораки од Скопје дека билатералните прашања не треба да го блокираат напредокот на земјата.