Македонскиот министер за надворешни работи Тимчо Муцунски и неговата бугарска колешка Велислава Петрова-Чамова в четврток ќе имаат можност за билатерална средба во Софија, по иницијативата што Скопје ја покрена по посетата на претседателката на Европската комисија Урсула фон дер Лајен.
Бугарското Министерство за надворешни работи за БТА потврдило дека средбата може да се одржи на маргините на меѓународната министерска конференција за Коридорот 8, чиј домаќин е Софија.
„На 8 октомври во Софија ќе се одржи меѓународна министерска конференција за Коридорот 8. Во рамките на форумот, на кој ќе присуствува и министерот за надворешни работи на Република Северна Македонија, Тимчо Муцунски, ќе има можност да се одржи билатерална средба, која е дел од редовниот дијалог меѓу двете земји“, соопштиле од бугарското МНР.
Потврдата од Софија дојде неколку часа откако премиерот Христијан Мицкоски рече дека македонската страна сè уште нема официјален одговор на барањето за средба.
Фон дер Лајен предложила да се направи прв чекор
Иницијативата следува по разговорите меѓу Мицкоски и фон дер Лајен во Скопје. Премиерот рече дека по нејзиниот совет го задолжил Муцунски да побара средба со бугарската министерка.
Од Министерството за надворешни работи во петокот потврдија дека дипломатското барање било испратено до Софија.
Фон дер Лајен по средбата во Скопје рече дека е договорено да се направи „прв чекор“ и обидот за деблокада да се претвори во процес.
Мицкоски денеска ги отфрли оценките на опозицијата дека посетата на фон дер Лајен била разочарувачка, велејќи дека претседателката на Европската комисија позитивно ја оценила работата на Владата во процесот на европска интеграција.
Филипче: Средбите требаше да почнат порано
Лидерот на СДСМ Венко Филипче, пак, оцени дека Владата требало многу порано да иницира разговори со соседните земји членки на ЕУ, наместо да чека поттик од Брисел.
Според Филипче, посетата на фон дер Лајен ги покажала проблемите во досегашното управување со евроинтегративниот процес.
СДСМ во последните денови повторно ја обвинува Владата дека не ги обезбедила „подобрите позиции“ што ВМРО-ДПМНЕ ги најавуваше пред да дојде на власт.
Софија останува на европскиот консензус
Од бугарска страна, пораките пред средбата остануваат врзани за Договорот за добрососедство и европскиот консензус од јули 2022 година.
Бугарската претседателка Илијана Јотова рече дека Софија е отворена за дијалог, но „без ултиматуми и без отстапување од европската политика“.
Таа оцени дека прашањето за напредокот на Северна Македонија кон ЕУ не треба да се третира како чисто билатерален спор меѓу Скопје и Софија.
Лидерот на ГЕРБ и поранешен бугарски премиер Бојко Борисов, пак, порача дека од Северна Македонија се очекува почитување на Договорот за добрососедство и обврските преземени во рамки на европскиот процес.
Двете страни со познати позиции
Муцунски и Петрова-Чамова последен пат имаа билатерална средба кон крајот на мај, на маргините на состанок на НАТО во Шведска.
Муцунски тогаш рече дека прашањата поврзани со македонскиот јазик, идентитет, култура и историја не можат да бидат предмет на преговори.
Петрова-Чамова го повтори ставот на Софија дека спроведувањето на обврските од европскиот консензус од 2022 година е услов за натамошен напредок на Северна Македонија кон ЕУ.
Средбата во четврток ќе покаже дали обновениот контакт ќе остане на ниво на редовен политички дијалог или ќе отвори простор за поконкретни разговори за деблокирање на пристапниот процес.