9.8 C
Скопје
29 февруари, 2024
Inbox7.mk
ВЕСТИНАСЛОВНАРЕПУБЛИКА

Торбешите во Уставот, камен на сопнување

Барањето Торбешите да бидат внесени во преамбулата на Уставот на РСМ, кое досега во повеќе наврати го најавуваше Партијата за европска иднина (ПЕИ), може да  го комплицира процесот на уставните измени, пишува ДВ.

Иако уставните измени беа иницирани, пред сѐ, поради условот Бугарите да бидат впишани во Уставот, беше најавено дека тој процес ќе се искористи во него да бидат внесени и други заедници. На последниот попис од 2021 година, 3.504 граѓани се изјаснија како Бугари, како Египќани 2.406, Хрвати 2.145, Црногорци 1.023, а како Торбеши 4.174, иако нивни претставници тврдат дека нивниот број е многу поголем.

„Статутарна и главна програмска цел на Партијата за европска иднина е Торбешите да бидат дел од преамбулата на Уставот на РС Македонија. Веќе е подготвено официјално барање и чекаме да се отворат преговорите со политичките партии за отворање на Уставот“, најавија од ПЕИ уште минатото лето.

Торбешите, кои се Македонци со исламска вероисповед, сметаат дека „според своите етнички, религиозни, јазични и културни карактеристики заслужуваат посебност и рамноправен статус со останатите етникуми во земјата“.

Но, една од партиите на Турците веќе изнeла став дека за нив е неприфатливо Торбешите да влезат во Уставот како посебна заедница, а покрај ова тлее и незадоволство од неисполнувањето на барањето за промена на изборниот модел – за една изборна единица.

Според упатени во актуелните случувања, во коалицијата предводена од СДСМ има помали партии кои може поддршката за уставни измени да ја условуваат со барања за изборни измени, со цел на следните избори да имаат поголема партиска конкурентност, но велат дека кај некои од нив има и други барања, па „тешко е да се оцени кое барање им е приоритетно, а кое е наменето ‘за пазарање’“.

Според неофицијални информации, противењето Торбешите да бидат внесени во Уставот е став од кој немало да има ретерирање кај претставници на турската заедница. А доколку би бил прифатен предлогот да бидат впишани во Уставот, наводно тоа би можело да го чини мнозинството еден глас помалку.

Со почетокот на активностите на работната група при Министерството за правда, која е пред обврската да подготви Предлог-иницијативата за измени на Уставот за внесување на Бугарите и други заедници, барањето на Торбешите доби и легитимна адреса каде ќе бара негова реализација.

Related posts

Максимум штедење за минимум живеачка

admin

ЗИГЗАГ: ОМРАЗАТА КАКО АДУТ ЗА ПОБЕДА НА ИЗБОРИ

admin

Нова афера на повидок: Дали ВМРО-ДПМНЕ се прислушкува?

admin

МЕШАЊЕ ВО ПАЗАРОТ ИЛИ БОРБА ПРОТИВ ПРЕХРАНБЕНИ КАРТЕЛИ?

ninja

Од дрвото не се гледа шумата, од партиите – идеологијата

admin

Советот на ЕУ со заклучоци за дигитализацијата: Сите правата да се применуваат и во онлајн светот

admin