Без спроведување на потребните реформи, Република Северна Македонија не може реално да ги започне преговорите за влез во ЕУ и ризикува да се одвои од Албанија. Ова го коментира бугарскиот европратеник Илхан Ќучук, кој е копретседател на Алијансата на либералите и демократите за Европа (АЛДЕ) и известувач во Европскиот парламент за Северна Македонија.
„Без промена на Уставот, Република Северна Македонија навистина не може да почне да преговара со ЕУ“, изјави бугарскиот европратеник во интервју за БГНЕС.
Тој предупреди дека доколку Скопје не ги направи овие промени во блиска иднина, ќе се одвои од Албанија на патот кон ЕУ. Така, Северна Македонија ќе остане во една група со Србија, Косово, Босна и Херцеговина.
„Никој не поставува дополнителни услови (на Скопје). Условите се тие и двете страни се договорија – Бугарија и Република Северна Македонија. Тие ги изгласаа овие услови во бугарското, односно во македонското собрание. Оттука овие договори мора да се исполнат“, вели Ќучук.
Пораката доаѓа во пресрет на собраниската седница на 18 август на која треба да се утврди потребата од уставни измени. Засега нема консензус меѓу власта и опозицијата за ова прашање.
Политичките партии во владина коалиција предводена од СДСМ и ДУИ, предложија потпишување на заеднички Манифест преку кој, како што велат, ќе се даде поддршка за водење преговори за полноправно членство во ЕУ. Со Манифестот се повикува на обединување на сите политички партии, во контекст на поддршката за уставните измени со кои Бугарите и пет други народи треба да се вметнат во Преамбулата.