Партијата која во 2015 ветуваше дека виновниците за нелегалното прислушување ќе одговараат, во 2023, од позиција на власт, набрзина го измени Кривичниот законик. Измените отворија можност многу од делата што произлегоа од прислушувањето да застарат. Капиталното дело за прислушувањето веќе застаре.
Дали сте подготвени да ја слушнете „Вистината за Македонија“, праша тогашниот лидер на опозициската партија СДСМ, Зоран Заев на 9 февруари 2015 година. Со кошула со подвиткани ракави, без вратоврска, тој излезе пред насобраните граѓани, медиуми, партиски членови и почна да ги објавува таканаречените бомби – аудио снимки од нелегално прислушувани разговори, кои со месеци претходно ги најавуваше.
„Целта е да ја вратиме слободата и демократијата во Република Македонија“, рече Заев.
Обзнани дека во период од неколку години во земјата биле прислушувани над 20 илјади граѓани, меѓу нив – опозиционери, министри, обични граѓани. Само разговорите меѓу премиерот Никола Груевски и шефот на тајната полиција Сашо Мијалков не биле прислушувани, рече Заев.
Според него, разговорите ги снимале македонските безбедносни служби, по директна наредба на Груевски и на Мијалков.