Граѓаните поделени, едни сметаат дека е добро што сите близу имаат голем мол за пазарување, други прашуваат кој ќе купува во сите нив, трети дека Скопје личи на Лас Вегас. Економистите со кои разговаравме велат на Скопје повеќе му треба саем, но на крај победува интересот на самиот инвеститор.
Скопје нема саем, министерскиот состанок на ОБСЕ ќе биде во спортска сала, таму се одржуваат и концерти, театрите кои се монтажни објекти се распаѓаат, паркови има се помалку… но отворањето големи трговски центри е тренд во Северна Македонија, особено во главниот град. Последниве години само во Скопје се отворија и наскоро ќе се отворат уште нови модерни молови. Се проценува дека поголемите молови вкупно зафаќаат површина од 100.000 квадратни метри, што е простор поголем од 15 спортски терени, или речиси иста квадратура колку 30 „Филхармонии“ или педесетина театри како МНТ.
Сликата деновиве ја надополнуваат градежните реони во кои стотици работници брзаат да ги запазат роковите за сечење на лентата, а зад нив наѕираат нови архитектонски решенија со стотици продавници и ресторани и само по некој нов бренд.
Наспроти тоа, на десетина локации во Скопје и на уште толку низ државата зјаат полупразни старите молови како Градскиот трговски центар, ТЦ Кисела Вода, Скопјанка… Се повеќе дуќани се со катанец на врата или со натпис „се издава/продава“.