Украински дронови повторно го нападнаа руското пристаниште Туапсе на Црното Море, четврти пат во последните 16 дена, предизвикувајќи нови пожари и еколошки последици.
Според украинската безбедносна служба, цел на нападите биле пристаништето и рафинеријата, клучни за извозот на руска нафта. Локалните руски власти потврдија дека е во тек операција за гаснење на пожарот, но засега нема информации за жртви.
Рафинеријата била погодена и запалена најмалку двапати од средината на април, што довело до прекин на производството, густ црн чад над градот и истекување на нафта во морето, со што се оштетени плажите во регионот.
Руските власти соопштија дека досега се отстранети над 13.000 кубни метри загадено гориво и почва од крајбрежјето.
Во меѓувреме, Русија извршила масовен напад врз Украина со околу 410 дронови. Украинската противвоздушна одбрана соопшти дека неутрализирала 388 од нив.
Во западниот град Тернопил биле повредени 10 лица, додека во други региони се пријавени оштетувања на инфраструктура, училишта и станбени објекти.
Украинскиот претседател Володимир Зеленски најави дека во јуни ќе започне реформа на армијата, насочена кон решавање на недостигот од војници и подобрување на условите за пешадијата.
„Војникот што ја држи линијата на фронтот мора да чувствува дека државата го почитува“, рече Зеленски, најавувајќи повисоки плати и системски промени.
Во одделен случај, обвинителите во Перу истражуваат мрежа која наводно регрутирала луѓе со лажни ветувања за работа во Русија, а потоа ги принудувала да учествуваат во војната во Украина. Според локалните извештаи, најмалку 13 перуански државјани загинале во конфликтот.