Пасошите, возачките дозволи, книшките на автомобилите, личните карти и кој било друг документ со старото име на државата „Република Македонија“ од денеска стануваат неважечки, без разлика дали се уште има рок на важност, јавува Инбокс7.
Според статистичките податоци, илјадници граѓани ризикуваат да не можат да ја напуштат државата или да се вратат дома по 12 февруари или да бидат казнети во сообраќајот поради употреба на неважечки дозволи.
Граѓаните на Северна Македонија продолжуваат да чекаат ред во полициските станици за да се обидат да ги добијат новите документи.
Иако старите лични карти може да останат валидни во земјата, доцнењето со издавањето на пасошите се заканува да влијае на движењето на граѓаните, да го ограничи нивното патување и да ги спречи оние кои се во странство по 12 февруари да се вратат дома.
„Физички е невозможно да се издадат сите документи во рокот. Самото печатење и издавање на пасоши претставува најголем проблем и тој може да се намали само со подобра организација и менаџирање“, изјави техничкиот министер за внатрешни работи од редовите на ВМРО-ДПМНЕ, Панче Тошковски.
Со сегашната стапка на издавање околу 50.000 пасоши месечно, тој процени дека ќе биде потребна уште една цела година за да се заврши овој процес.
Прашањето за името со Грција се одолговлекуваше со децении, што предизвика грчко вето против Северна Македонија за употребата на името „Македонија“, тврдејќи дека тие имаат регион со истото име.
Решението на спорот за името дојде во 2018 година, кога тогашнаречената Република Македонија го потпиша Договорот од Преспа со Грција, со кој се согласи да се смени името во Северна Македонија за да се надмине ветото од Атина што ја спречуваше земјата да влезе во ЕУ и НАТО.