Претседателот на Собранието Африм Гаши денеска реагираше откако пред неколку дена пратеникот Христијан Мицкоски го повика да се извини откако во интервју за РТК изјави дека „Косово е моја татковина“.
Во своето објаснување, објавено на Фејсбук, Гаши вели дека имало превртување на неговата изјава од страна на медиумите.
Во меѓувреме, Мицкоски, одговарајќи на новинарско прашање по доделувањето на мандатот од претседателката Гордана Силјановска Давкова, вчера рече дека Гаши зема плата во Македонија и дека треба да се извини за изјавата дадена во РТК.
„Мислам дека неговата татковина е Македонија. И од она што сум разговарал со него, лично од него сум слушнал дека нашата заедничка татковина е нашата заедничка Македонија. Ако има таква изјава, тогаш мислам дека треба да им се извини на граѓаните на Македонија и тоа треба да го направи што е можно поскоро, бидејќи тука ја зема платата и е избран од Македонци, Турци, Албанци, Власи“, рече. Мицкоски.
Реакциите доаѓаат откако Гаши во интервју за „РТК“ зборуваше за историјата на неговото семејство, кое во 50-тите години на минатиот век од Качаник се преселило во Скопје. Тој рече дека Косово е неговата татковина и дека ги следи процесите кај северниот сосед.
„Оние кои се родени по деведесеттите не можат да го разберат ова, но за мене Косово е мојата татковина, местото каде што се родени моите родители и сочувствувам со се што се случува на Косово“, рече Гаши, според изјавата што ја пренесоа македонски медиуми.
Мицкоски најави дека наскоро ќе се формира новата реформска влада, но пред новинарите не ги откри имињата на новите министри.