„Никој не е против албанскиот јазик, ниту во Македонија. Ова е вештачка тема што се обидуваат да ја наметнат“, изјави премиерот на Северна Македонија, Христијан Мицкоски, зборувајќи за употребата на албанскиот јазик и Законот за јазици. Тој истакна дека албанскиот јазик не е загрозен во државата, пренесува Инбокс7.
„Верувајте, никој нема проблем со албанскиот јазик. Јас сум премиер и можам да потврдам дека тоа не е спорно. Темата ја наметнуваат оние што немаат други прашања за решавање“, рече Мицкоски во емисијата „Prime“ на РТК, косовски јавен радиодифузен сервис.
Тој посочи дека Законот за јазиците пет години бил во фиоките на Уставниот суд, а сега, за време на неговата влада, се актуализирал. „Истиот Уставен суд, со судии избрани од претходната власт на СДСМ и ДУИ, сега го извади законот на дневен ред“, рече премиерот, додавајќи дека прашањето се однесува само на три членови кои се однесуваат на судските постапки.
Мицкоски додаде дека албанскиот јазик е интегрален дел од македонското општество и дека државата се гордее со својата разновидност.
На прашањето за писмото на Али Ахмети околу заштитните механизми за заедниците, Мицкоски одговори дека не може да им нареди на уставните судии како да одлучуваат. „Не ги познавам лично судиите, а тие се избрани од претходната влада“, изјави тој.
Говорејќи за меѓуграничната соработка со Косово, премиерот истакна дека секој што ги почитува законите и Уставот на Северна Македонија слободно може да транзитира низ земјата.
Во врска со економската соработка, Мицкоски нагласи дека енергетската поврзаност, вклучително и изградбата на интерконектор за гас, ќе биде приоритет.
За инцидентот со претседателката на Косово, Вјоса Османи, на скопскиот аеродром, премиерот изјави дека вакви ситуации се случиле и претходно, нагласувајќи дека сите политичари треба да ги почитуваат правилата и процедурите на аеродромите.
Мицкоски објасни дека процедурите за безбедност на аеродромот се одредени од операторот на аеродромот и дека сите патници, без разлика на статусот, мора да ги почитуваат.
„Како премиер никогаш не користам ВИП терминал, туку патувам како и сите други патници, поминувајќи ги сите проверки. Ова е правило воспоставено од операторот на аеродромот, кој е делумно сопственост на француската компанија Aéroports de Paris. Секој кој патува со чартер-лет мора да ги следи инструкциите на пилотот, а за комерцијалните летови проверките се задолжителни,“ изјави тој.
На крај, Мицкоски истакна дека за Северна Македонија е важно да ги задржи добрите односи со соседите, вклучувајќи ја и Република Косово, и дека неговата влада е посветена на подобрување на соработката во сите области, особено економијата и енергетиката.