Даниел Сијад, моден скаут кој беше поврзуван со покојниот осуден сексуален престапник Џефри Епстин, е пронајден мртов во својот дом во Коломб, северозападно предградие на Париз, соопшти обвинителството во Нантер.
Обвинителството наведе дека во понеделник вечерта е отворена истрага за утврдување на причината за смртта и дека ќе биде извршена обдукција.
Сијад (69) се споменува илјадници пати во документите поврзани со случајот Епстин што беа објавени од американските власти. Тој претходно негираше дека знаел за злоупотребите што ги вршел Епстин.
Една од жртвите на Епстин, која за Би-Би-Си зборуваше под псевдонимот Ања, изјави дека токму Сијад ја запознал со Епстин.
„Тоа беше целосно наместено“, рече таа, нарекувајќи го Сијад „практично професионален трговец со луѓе“.
Во интервју за Си-Ен-Ен, Сијад тврдеше дека не знаел оти жените биле злоупотребувани.
„Му верував. Верував дека е професионалец“, изјави тој.
Истраги во Франција
Против Сијад во Франција беа поднесени неколку кривични пријави, меѓу кои и за силување. Првата била поднесена во февруари.
Тој ги негираше сите обвиненија. Во интервју за француската телевизија BFMTV во мај изјави:
„Никогаш во животот не сум силувал никого.“
Поранешен модел, која во јуни дала исказ во рамките на истрагата против Сијад, за Би-Би-Си изјави дека неговата смрт може трајно да ги лиши истражителите од важни информации за мрежата на Епстин.
„Важна алка во синџирот исчезна без воопшто да биде испрашана“, рече таа.
Адвокатката Ан-Клер Ле Жен од невладината организација Innocence en Danger, која се залагаше за отворање истрага за Епстин во Франција, оцени дека жртвите се лишени од можноста да добијат одговори.
„Многу е жално што бавната истрага доведе до тоа тој да почине пред да биде испрашан или приведен, со што жртвите останаа без клучен чекор во потрагата по вистината и правдата“, изјави таа.