Европската Унија останува целосно посветена на европската перспектива на Северна Македонија и нема сомневање дека земјата е идна членка на Унијата, изјави евроамбасадорот Михалис Рокас, нагласувајќи дека напредокот ќе зависи од исполнувањето на реформите и владеењето на правото.
„Не треба да имате никакво сомневање дека Европската комисија е целосно посветена да ја види вашата земја како полноправна членка на ЕУ“, рече Рокас на седницата на Националниот совет за евроинтеграција.
Тој оцени дека процесот на проширување е повторно добил динамика и посочи дека владеењето на правото останува главен предуслов за отворање на преговарачките поглавја.
„Предуслов за отворање на преговарачките поглавја е исполнувањето на строгите критериуми, особено во делот на владеењето на правото и нивната целосна имплементација“, изјави Рокас.
Евроамбасадорот рече дека, покрај законските реформи, неопходни се професионална јавна администрација, кадровски и финансиски зајакнато судство и институции ослободени од политички влијанија.
Вицепремиерот и министер за европски прашања Беким Сали изјави дека членството во ЕУ останува стратешки приоритет на државата и дека Планот за раст нуди можност за побрза економска интеграција и пристап до европскиот пазар.
Лидерот на опозицискиот СДСМ, Венко Филипче, оцени дека Северна Македонија заостанува зад другите земји кандидати и ја обвини Владата за застој во евроинтеграциите.
„Се поставува прашањето дали намерното запирање на европскиот пат не е форма на државен удар“, изјави Филипче.
Тој додаде дека земјата е единствената кандидатка која сè уште нема отворено преговарачки поглавја, додека Албанија, Црна Гора, Молдавија и Украина продолжуваат со процесот на пристапување.